Fizioterapiya fiziki amillər tətbiq olunmaqla mövcud tibbi müalicə vasitələrindən biridir və bir çox metodları var. Bunlardan elektro terapiya, lazer terapiya, maqnit terapiya kimi vasitələri, lazım olduğu təqdirdə isə müalicəvi bədən tərbiyəsi və masaj seanslarından istifadə olunur.

Aztibb.az xəbər verir ki, bu barədə Zaqatala Rayon Mərkəzi Xəstəxananın Fizioterapiya şöbəsinin müdiri, həkim-fizioterapevt Günay Bayramova məlumat verib.

Həkim bildirib ki, fizioterapiya zamanı əsasən dəriyə və dərialtı toxumalara təsir olunur. Bu müalicə vasitəsinin üstünlüyünün əsas səbəbi dərmansız, ağrısız, kəsiksiz müalicə metodu olmasındadır.

Onun sözlərinə görə, fizioterapiya ağır xəstəliklərdən sonra orqanizmin bərpa prosesində mühüm rol oynayan, həmçinin müxtəlif xəstəliklərin kəskinləşməsindən qorunmağa kömək edən müalicə-profilaktika vasitəsidir. Onun tətbiq olunmasında uşaqlarla böyüklər arasında heç bir fərq yoxdur. Fizioterapevtlər qamət problemlərini həll etməyə, xəstəliklərin bəzi fəsadlarını aradan qaldırmağa, zədələnmiş əzələləri tədricən bərpa etməyə, gərginliyi azaltmağa və orqanizmi xoşagəlməz xəstəliklərdən qorumağa kömək edirlər. Müasir günümüzdə fizioterapiya ən təhlükəsiz müalicə vasitəsi hesab edilir.