Dünyada hər il təxminən 19,5 milyon, Türkiyədə isə 250 min insana xərçəng diaqnozu qoyulur. Döş xərçəngi isə ən çox görülən ağciyər xərçəngidir.
Aztibb.az-ın medimagazin.com.tr-yə istinadla məlumatına görə, bu barədə Ankara Etlik Şəhər Xəstəxanası Tibbi Onkologiya Klinikasının professoru Ömür Berna Öksüzoğlu açıqlama verib.
O, tütün və tütün məmulatlarından istifadə etməmək, piylənmənin qarşısının alınması, sağlam qidalanma və nizamlı fiziki fəaliyyətin xərçəngdən qorunmaq üçün ən mühüm tədbirlərdən olduğunu bildirib.
Öksüzoğlu qeyd edib ki, Ümumdünya Səhiyyə Təşkilatının məlumatlarını ehtiva edən “GLOBOCAN” məlumatlarına görə, dünyanın 184 ölkəsində hər il təxminən 19,5 milyon insan xərçəngə tutulur, 10 milyona yaxın insan isə bu xəstəlikdən ölür.
Bu rəqəmlərin 10 il əvvəlki ilə müqayisədə artdığına diqqət çəkən türkiyəli professor bildirib ki, dünyada 10 il əvvəl xərçəng diaqnozu qoyulanların sayı 14 milyon, xərçəng səbəbiylə həyatını itirənlərin sayı isə 8 milyon idi. Bundan başqa, hər il 2,3 milyon qadına döş xərçəngi, 2,2 milyon insana isə ağciyər xərçəngi diaqnozu qoyulur.
Professor COVID-19 epidemiyası zamanı insanların müntəzəm xərçəng müayinələrinin pozulduğunu və bunun diaqnoz proseslərinə mənfi təsir göstərdiyini bildirib.