Trakya Universiteti (TU) Tibb fakültəsi Kardiologiya bölümünün rəhbəri, dos. Sərvət Altay risk qrupunda olan ürək xəstələrinə tərkibində həddindən artıq duz olan, qablaşdırılmış qidalardan uzaq durmağı tövsiyə edib.

Aztibb.az-ın medimagazin.com.tr-yə istinadla xəbərinə görə, o, Türkiyədə duz istehlakının normadan artıq olduğunu bildirib.

Həddindən çox duz istehlakının təzyiqi artırdığını deyən S.Altay bildirib ki, duz ürək və böyrək xəstəliklərinin kökündə dayanır. Dosent duz istehlakının gündə 5 qramı keçməməsinin və ürək xəstələrinin duz məsələsinə daha həssas yanaşmasının vacibliyini qeyd edib.

"Gündəlik duz miqdarı nəzərə alınarkən yalnız qidaya əlavə edilən duz deyil, eyni zamanda istehlak edilən digər qidalardakı duz miqdarı da qiymətləndirilməlidir. Xəstələrdə ağır ürək çatışmazlığı, yüksək təzyiq və böyrək çatışmazlığı varsa, duzlu qidalardan uzaq durmalıdırlar”, - deyə S.Altay bildirib.