"Nature Aging" jurnalı: ANC-1 zülalı rüşeym xətləri hüceyrələrinin əbədiliyini təmin edir.

Aztibb.az lenta.ru-ya istinadla xəbər verir ki, Yunanıstanın FORTH elmi-tədqiqat mərkəzi yanında Molekulyar Biologiya və Biotexnologiya İnstitutunun mütəxəssisləri hüceyrənin nüvəsini zədələrdən müdafiə edən və ona düzgün işləməyə kömək edən molekulyar mexanizm aşkar ediblər.

"Nature Aging" jurnalında dərc edilmiş tədqiqatın nəticələrinə əsasən, bu, çoxalma ilə bağlı hüceyrələrin əbədiliyini təmin edir.

Caenorhabditis elegans nematodları (yumru qurdlar) üzərində aparılmış sınaqlar göstərib ki, hüceyrə nüvəsinin düzgün işi üçün onun elementlərinin strukturunun avtofagiyası (udma və emal)  əhəmiyyətli amildir. Bu halda nüvə qabığının membranında yerləşən zülallar bu prosesdə əsas rol oynayır. Nematodlarda ANC-1 zülalları, məməlilərdə isə Nesprin-2 zülalları bilavasitə avtofagiyaya məruz qalaraq nüvələrin ölçüsünün artımına mane olurlar.

ANC-1 həmçinin rüşeym xəttinin, başqa sözlə hüceyrənin fasiləsiz xəttinin əbədiliyi təmin edir.  Bu zülalın təkrar istehsalı yeni nəslin yaranması üçün əhəmiyyətlidir. ANC-1-in funksiyasının pozulması bir neçə sonrakı nəsil ərzində davam edən sonsuzluğa səbəb olur, həmçinin şiş hüceyrələrinin yaranmasına gətirib çıxarır.