Uşaqların sağlamlığı həm də gigiyenik qaydalara əməl edilməsindən asılıdır. Analar bu sahədə daha həssas olurlar, lakin təmizlik vasitələrindən istifadə zamanı diqqət yetirilməsi vacib olan məsələləri bilmək əhəmiyyətlidir. Azyaşlıların dərisi zərif və həssas olduğuna görə yalnız onlar üçün istehsal edilən məhsullara üstünlük verilməlidir.

Aztibb.az xəbər verir ki, bu barədə həkim-dermatoloq Solmaz Orucova məlumat verib. O, bildirib ki, uşaq dərisi üçün ən çox nəmləndirici xüsusiyyətə malik olan kremlərdən istifadə etmək məsləhətdir, lakin onların tərkibində heç bir qatqı və hormonal maddələr olmamalıdır. Tərkibi A və E vitaminləri ilə zəngin olan başqa kosmetik vasitələrdən də istifadə etmək olar.

Mütəxəssis bildirir ki, şampun, sabun və digər təmizlik vasitələri uşağın dərisinə uyğun seçilməlidir. Həkim-dermatoloq qeyd edib ki, ilk növbədə, sabunu və ya maye sabunu köpük halına gətirəndən sonra körpənin dərisinə sürtmək lazımdır, çünki birbaşa təmas uşağın dəri səthinin qoruyucu funksiyasını aşağı sala bilər. Bundan başqa, ən çox quru dərisi olan uşaqlar üçün tərkibində qliserin, vazelin, kokos yağı və yaxud zeytun yağı olan sabunlardan istifadə edilməlidir.

"Bu zaman yaş kateqoriyasını da nəzərə almaq çox əhəmiyyətlidir",  - deyən dermatoloq S.Orucova hər yaşa uyğun təmizlik vasitələrinin fərqli tərkibə malik olduğunu, körpələr üçün əlavə rəng qatqısı, allergik təsiri olmayan sabun və şampunların daha məqsədəuyğun olduğunu söyləyib. Əlavə edib ki, tərkibində efir yağı olan təmizlik vasitələrindən isə uşağın 3 yaşından etibarən istifadə etmək olar. Sərt sabunlarla yalnız körpələrin əllərini yumaq məsləhətdir.