Yağ turşuları doymuş və doymamış olmaqla 2 yerə ayrılırlar. Doymamış yağ turşularına Omega yağ turşuları aiddir. Qidalanmanın vacib komponentlərindən olan bu yağ turşuları Omega 3, 6, 9 olaraq diferensasiya olunurlar. 

 

Aztibb.az xəbər verir ki, bu barədə həkim-endokrinoloq Fərhad Burzu məlumat verib.

 

Həkimin sözlərinə görə, hər keçən gün cəmiyyətdə dəniz məhsullarının istehlakının azalması, eyni zamanda onların qeyri-orqanik (xüsusi yetişdirmə) olması insanların ilin uyğun fəsillərində Omeqa 3, 6 və 9-dan istifadəsində önəmlidir. Omega-3 və Omega-6 essensial (əvəzolunmayan) yağ turşuları olub orqanizmdə sintez olunmur. Omega-3 yağ turşusunun EPA, DHA və ALA kimi çox rast gəlinən növləri vardır.

 

Fərhad Burzu Omega-3 yağ turşusunun faydalarını da sadalayıb:

 

ürək-damar sistemi xəstəlikləri;

immun sistemi;

xolesterini səviyyəsi;

uşaqlarda beyin inkişafı;

Alzheimer xəstəliyi

şəkərli diabet.

 

Omega-3 ilə zəngin qidalar aşağıdakılardır:

 

balıq yağları (əsasən somon, ringa balığı);

yumurta;

bitki toxumları (kətan toxumu, çia toxumu);

soya;

fındıq, qoz.

 

Endokrinoloq bildirib ki, günlük Omega-3 ehtiyacı qadınlar üçün 1.1 qr., kişilər üçün 1.6 qr.-dır. Omega-6 yağ turşusun isə günlük ehtiyacı qadınlar üçün 12 qr, kişilər üçün 16 qr-dır. Daha çox günəbaxan və qarğıdalı yağında rast gəlinir.

 

"Omega-9 yağ turşusu essensial deyil, yəni orqanizmdə sintez olunur. Fındıq və zeytun yagında miqdarı daha çoxdur. Ümumilikdə omega yağ turşuları lipid mübadiləsində önəmli rol oynayır. Belə ki, qaraciyər piylənmələri zamanı və qanda xolesterin səviyyəsi yüksək olduqda xəstələrə təyin edilən preparatlardandır", - deyə həkim əlavə edib.