Dünyada ən çox sevilən içkilərdən biri çay hesab olunur. Xüsusən də insan orqanizmi üçün faydalı olan bitki çayları əvəzolunmazdır. Bitki çaylarının qəbulu sağlamlığın qorunması, çəki atmaq, immunitet sisteminin gücləndirilməsi və bəzi xəstəliklərin müalicəsində istifadə edilən ən mühüm alternativ tibb üsullarından biridir. Ona görə də, bitki çaylarının insan orqanizminə təsirini və hazırlanma qaydasını bilmək vacibdir.
Aztibb.az xəbər verir ki, bu barədə məlumat verən həkim-fitoterapevt Elnur Eldaroğlu bildirib ki, bitki çaylarını dəmləyərkən onun temperaturu 70-80 dərəcədən çox olmamalıdır, çünki daha yüksək temperaturda dəmləyəndə təsiri bir qədər zəifləyir. Bəzi çaylar allergiyaya, mədə-bağırsaq sisteminin işinin pozulmasına səbəb ol bilər, ona görə də, bunları nəzərə almaq lazımdır. Bitki çayları ilə müalicə iki aya qədər davam edə bilər.
Bitki çayları tərkibindəki efir yağları, antioksidantlar və digər birləşmələrə görə sağlamlıq üçün faydalı hesab olunur. Həkim-fitoterapevtin sözlərinə görə, qida qəbulundan sonra həzm narahatlığı olduqda nanənin limonlu çaya qarışdırıb içilməsi ən yaxşı yardımçı vasitədir. Qara çaya razyana qatılıb içilməsi köp problemini aradan qaldırır. Çaya bir çubuq darçın əlavə edilməsi insulin çatışmazlığı zamanı faydalı təsir göstərir. Darçın şəkərə olan tələbatı və insulin çatışmazlığını aradan qaldırır.
"Bitki çayları mütəmadi olaraq həddindən artıq istifadə edildikdə sağlamlığa ciddi ziyan verə bilər", - deyən E.Eldaroğlu əlavə edib ki, bitki çaylarını istifadə etməzdən əvvəl onların tərkibi haqqında məlumatlı olmaq lazımdır.
Həkim-fitoterapevt qeyd edib ki, yuxarı tənəffüs yollarının problemi ilə üzləşdikdə cökə çayından istifadə etmək olar, bal və limon əlavə edilmiş itburnu çayı da təsirli vasitədir. Sarıkök və zəncəfil çayı içilməsi də mikrobları məhv edir, iltihabı prosesin qarşısını alır”.
O, vurğulayıb ki, vitamin və minerallarla zəngin olan bitki çayları bədənin bir çox tələbatını ödəyir və bəzi fizioloji problemləri həll edir.