Alimlər xəbərdarlıq edirlər ki, kimyaterapiya dərmanları xərçəng xəstələrinin uşaqları və nəvələrində xəstəlik riskini artıra bilər.

Aztibb.az bu barədə medimagazin.com.tr-yə istinadla xəbər verir.

ABŞ-ın Vaşinqton Dövlət Universitetində siçanlar üzərində aparılan sınaqlar zamanı gənc erkək gəmiricilərə ifosfamidin verilməsinin onların uşaqlarının ən azı iki nəslinə ötürülən zərərli genetik dəyişikliklərə səbəb olduğu göstərilib. Xərçəng şişləri ilə yanaşı, bu dəyişikliklər böyrək və reproduktiv xəstəliklər, davranış və öyrənmə problemləri ilə də əlaqələndirilib.

Tədqiqatçılar hesab edirlər ki, kimyaterapiya körpələrə keçən sperma hüceyrələrinə zərər verə bilər.

Qeyd edək ki, ifosfamid Ümumdünya Səhiyyə Təşkilatı (ÜST) tərəfindən əsas dərmanlardan biri kimi siyahıya alınmışdır. 1980-ci illərin sonlarında təsdiqləndikdən sonra yüz minlərlə insana verilmişdir.