Tanınmış uroloji cərrah və transplantoloq, Respublika Diaqnostika Mərkəzinin Böyrək xəstəlikləri və transplantologiya şöbəsinin müdiri Rəşad Şolan Azərbaycan Respublikasının Prezidenti yanında Ali Attestasiya Komissiyasının qərarı ilə tibb elmləri doktoru elmi dərəcəsini alıb.

Aztibb.az xəbər verir ki, bu barədə o, özünün feysbuk səhifəsində paylaşım edib.

"Bu gün həyatımın ən unudulmaz anıdır. Tələbə Elmi Cəmiyyətindən başlayan yol bu gün məntiqi ünvanına çatdı. Doktorluq dissertasiyamda, ilk dəfə olaraq, urologiyanın ən aktual xəstəliklərindən biri olan “interstisial sistit”in patofizioloji eksperimental modelini ortaya qoyduq, diaqnostik biomarkerlərin rolunu öyrəndik. ESSİC 2019 (European Society for Study of Interstitial Cystitis) və SUFU 2020 (Society of Urodynamics and Female Urology) kimi nüfüzlü konqreslərdə nəticələrimizi məruzə etdim. Bu nəticələrə artıq xeyli sayda istinadlar var. Bu çətin yolda mənə dəstək olan hər kəsə təşəkkürümü bildirirəm", - Rəşad Şolan sosial şəbəkədəki hesabında yazıb.