Molekulyar Biologiya və Biotexnologiyalar İnstitutunun (MBBİ) əməkdaşlarının Çexiya, Slovakiya, Səudiyyə Ərəbistanı, Misir və Banqladeşdən olan alimlərlə birlikdə apardıqları tədqiqatlarının nəticəsi nüfuzlu “Agronomy” jurnalında nəşr edilib.
Bu barədə Aztibb.az-a AMEA-dan bildirilib.
İnstitutun Xloroplastların fotokimyası laboratoriyasının aparıcı elmi işçisi biologiya üzrə fəlsəfə doktoru Ülkər İbrahimova, Genomun quruluşu və ekspressiyası laboratoriyasının müdiri biologiya üzrə fəlsəfə doktoru Ələmdar Məmmədov və həmin laboratoriyanın aparıcı elmi işçisi biologiya üzrə fəlsəfə doktoru Zərifə Süleymanovanın həmmüəllif olduqları məqalə “Duz stresinə adaptasiya mexanizmlərinin iki yumşaq buğda (Triticum aestivum L.) genotipində qiymətləndirilməsi” adlanır.
Məqaləyə baxış sayının çox olmasına və çoxsaylı yükləmələrə görə jurnalın baş redaktoru Niki Syuy Ülkər İbrahimovaya təbrik məktubu göndərib. O, alimlərimizlə əməkdaşlığı yüksək qiymətləndirdiyini və əlaqələrin davamlı olmasını arzuladığını bildirib.