Ölkəyə COVID-19-la bağlı Rusiya, Türkiyə və Kubadan gələn mütəxəssilərlə dərman protokollarını, müalicə vasitələrini müzakirə edirik.
Aztibb.az-ın məlumatına görə, bunu Tibbi Ərazi Bölmələrini İdarəetmə Birliyinin (TƏBİB) şöbə müdiri Yaqut Qarayeva deyib.
Y.Qarayeva bildirib ki, ölkəmizə gələn xarici həkimləri ən çox təəccübləndirən məqamlardan biri də Azərbaycanda olan dərmanlardır, çünki bu dərmanların çoxu başqa ölkələrdə hazırda çətin tapılır. Bu dərmanlar ölkəmizə gətirilib və proses davam edir: "Vətəndaşların apteklərdən aldıqları dərmanlara gəldikdə isə, bu zaman diqqətli olmaq lazımdır. Xüsusilə də sosial şəbəkələrdə koronavirusla bağlı müxtəlif dərman preparatlarının adları çəkilir. Dərmanların xeyri olduğu kimi ziyanı da var, hər dərman preparatını ev şəraitində istifadə etmək olmaz.
Evdə istifadə oluna bilən dərmanların siyahısı Səhiyyə Nazirliyi və TƏBİB tərəfindən açıqlanıb. Bunlar əsasən evdə müalicə alan xəstədə qızdırma olarsa, hərarəti salmaq üçün istifadə olunan dərmanlar və vitaminlərdir".
TƏBİB rəsmisi qeyd edib ki, digər antiviral dərmanları axtarmaq, almaq, evdə saxlamaq, ev şəraitində istifadə etmək yanlış yanaşmadır. Əgər göstəriş olarsa, həmin dərmanlar xəstələrə verilir: "Bu dərmanların əks təsirləri var, ona görə də həmin preparatları təyin etməzdən qabaq xəstələrin sağlamlıq göstəriciləri yoxlanılır. Bu dərmanları nəzarətsiz istifadə etmək düzgün deyil".