Akad. C. Abdullayev adina Elmi-Tədqiqat Kardiologiya İnstitutu tərəfindən ölkə ərazisində şəhid ailələrinin üzvləri və Vətən müharibəsi qaziləri üçün tibbi aksiyalar keçirilir.

Növbəti tibbi aksiya iyul ayının 30-da Elmi-Tədqiqat Kardiologiya İnstitutu və Zaqatala Rayon Mərkəzi Xəstəxanasının birgə təşkilatçılığı və təşəbbüsü ilə baş tutub.

Aksiya zamanı Balakən, Qax, Zaqatala rayonlarında yaşayan və qeyd edilən həssas kateqoriyalardan olan 100-dən artıq vətəndaş kardioloji, endokrinoloji, şüa-diaqnostika və nevroloji müayinələrdən keçib. Onlara EKQ, ExoKQ və USM müayinəsi aparılıb.

Müayinələrin nəticələrinə əsasən xəstələrə müvafiq müalicələr təyin edilib, digər patologiya aşkar olunan şəxslər isə ixtisaslaşmış tibb müəssisələrinə yönləndiriliblər.

Zaqatala Rayon Mərkəzi Xəstəxanasında keçirilən aksiya yerli əhali tərəfindən məmnunluqla qarşılanıb.

Qeyd edək ki, tədbir "Gen İlaç", "Altes Pharm" və "Herba Flora" farmaseptik şirkətlərinin dəstəyi ilə gerçəkləşib.