Şamaxı Müalicə Diaqnostika Mərkəzində “İcbari tibbi sığorta” mövzusunda maarifləndirici tədbir keçirilib. Tədbirdə rayon icra hakimiyyəti başçısının müavini, İctimai-siyasi və humanitar məsələlər şöbəsinin müdiri Mehriban Eyubova, İcbari Tibbi Sığorta üzrə Dövlət Agentliyinin Şamaxı filialının rəhbəri Elşən Rəcəbov, rayon mərkəzi xəstəxanası publik hüquqi şəxsin direktoru Emin Hüseyn, rayonda fəaliyyət göstərən idarə, müəssisə və təşkilatların rəhbərləri, ictimaiyyət nümayəndələri iştirak ediblər.
Əvvəlcə Azərbaycan Respublikasının ərazi bütövlüyü uğrunda həlak olmuş şəhidlərimizin əziz xatirəsi bir dəqiqəlik sükutla yad olunub.
Tədbiri giriş sözü ilə açan Şamaxı Rayon İcra Hakimiyyətinin başçısının müavini Mehriban Eyubova son illər ölkəmizdə, o cümlədən rayonda səhiyyənin inkişafı, maddi-texniki bazasının möhkəmləndirilməsi istiqamətində görülən işlərdən danışaraq icbari tibbi sığorta ilə bağlı yerlərdə əhalinin maarifləndirilməsinin əhəmiyyətini vurğulayıb, bu kimi tədbirlərin keçirilməsinin vacibliyini qeyd edib.
Çıxış edən İcbari Tibbi Sığorta üzrə Dövlət Agentliyinin Şamaxı filialının rəhbəri Elşən Rəcəbov, Şamaxı Rayon Mərkəzi Xəstəxanası publik hüquqi şəxsin direktoru Emin Hüseyn icbari tibbi sığorta haqqında, habelə tibbi xidmətlərdən istifadə qaydaları və sığorta haqları, xidmətlər zərfinə daxil olan tibbi xidmətlər və bu xidmətlərin həyata keçirildiyi dövlət və özəl tibb müəssisələri barədə tədbir iştirakçılarına geniş məlumat veriblər.
Tədbir qarşılıqlı diskussiya şəraitində keçib, iştirakçıları maraqlandıran suallar cavablandırılıb.
