O, bipolyar pozuntu, depressiya, həyəcan riski ilə assosiasiya olunur. Alimlər hesab edirlər ki, gecə vaxtı insanlar imkan daxilində küçə işığının təsirindən çəkinməlidirlər.

Pəncərədən daxil olan süni işıq gecə vaxtı yeniyetmələrin yuxusunu pozur. O, depressiya və həyəcanın inkişaf riskini artırır. Bu barədə "JAMA Psychiatry" jurnalında dərc edilmiş tədqiqat işində məlumat verilir.

Aztibb.az saytı medportal.ru resursuna istinadla məlumat verir ki, alimlər ABŞ-da tipik şəhər və kənd rayonlarının gecə işıqlandırılmasını qiymətləndiriblər. Bunun üçün onlar Birləşmiş Ştatların okean və atmosfer üzrə Milli Administrasiyası peyklərinin məlumatlarından istifadə ediblər.

Tədqiqatın müəllifləri bu rayonlarda yaşayan 10 mindən çox yeniyetmədən müsahibə alıblar. Alimlər xüsusi cədvəllərə əsasən onların həyəcan və depressiya dərəcəsini qiymətləndiriblər.

Məlum olub ki, işıqlandırmanın daha intensiv olduğu ərazilərdə yeniyetmələrdə yuxu pozuntuları, yüksək depressiya və həyəcan riski müşahidə olunur.

Orta hesabla, ən işıqlandırılmış rayonlardan olan yeniyetmələr az işıqlandırılmış ərazilərdə yaşayan yaşıdlarına nisbətən 29 dəqiqə sonra yuxuya gedirlər və 11 dəqiqə daha az yatırlar. Süni işığın ən yüksək olduğu rayonlarda bipolyar pozuntunun inkişafı riski 19%, depressiya və həyəcan riski isə 7% daha çoxdur.