Sumqayıt Tibb Mərkəzi 1 İyun – Uşaqların Beynəlxalq Müdafiəsi Günü münasibətilə uşaqların sağlamlığının qorunması istiqamətində "Uşaqların sağlamlığının keşiyində" şüarı ilə aksiyaya start verib.

 

Aztibb.az xəbər verir ki, Abşeron-Xızı Regional Təhsil İdarəsinin dəstəyi ilə keçirilən aksiyanın ikinci günü 8 nömrəli orta məktəbdə təşkil edilib.

 

Həmin məktəbdə Sumqayıt Tibb Mərkəzinin 3 həkimi - pediatr, oftalmoloq və stomatoloq 50 nəfər şagirdi müayinədən keçirib.

 

Əlavə müayinəyə ehtiyacı olan şagirdlərə müvafiq tibbi göstərişlər verilib. Müayinədən keçən məktəblilər 1 İyun – Uşaqların Beynəlxalq Müdafiəsi Günü münasibətilə Sumqayıt Tibb Mərkəzi tərəfindən təbrik edilib və onlara hədiyyələr verilib.

 

Qeyd edək ki, 3 gün davam edən aksiyada ümumilikdə ibtidai siniflərdə təhsil alan 150 şagirdin müayinədən keçirilməsi nəzərdə tutulur.

 

Aksiyanın sonuncu günü iyunun 2-də Fəxrəddin Piriyev adına 18 nömrəli tam orta məktəbdə təşkil ediləcək.