Alimlər yeni növ koronavirus (COVID-19) xəstələrinin qanının süngər rolunu oynayan kiçik şarlarla doldurulmuş filtr vasitəsilə təmizlənə biləcəyini açıqlayıblar. ABŞ-da istehsal olunan və hazırda sepsis xəstələri üçün istifadə olunan "CytoSorb" adlı cihaz xəstələrin qanını təmizləyir və sitokinlər adlanan zəhərli birləşmələri aradan qaldırır.

Aztibb.az medimagazin.com.tr-yə istinadla xəbər verir ki, "Sitokin fırtınası"nın səbəb olduğu ağciyər iltihabı, koronavirus xəstələrinin ölümündə ən əhəmiyyətli faktor olaraq qəbul edilir.

Cihazın COVID-19-a qarşı effektivliyini qiymətləndirmək üçün hazırda sınaqlar aparılır və bu günə qədər 30 ölkədə 200-dən çox xəstə bu cihaz vasitəsilə müalicə edilib. Reading Universitetinin mikrobiologiya üzrə professoru Simon Klark bildirib ki, qan filtrləri kimi texnologiyalar, xəstədə kifayət qədər tez istifadə edildiyi təqdirdə çox faydalı ola bilər.

"Sitokin reaksiyası olan xəstələr üçün zaman vacibdir. Filtrləmə sağalmağa zəmanət vermir, lakin xəstəyə nə qədər tez tətbiq olunarsa, nəticə bir o qədər yaxşı olar", - deyə alim bildirib.