Aztibb.az xəbər verir ki, Azərbaycan Respublikasının Qida Təhlükəsizliyi Agentliyi (AQTA) ilə “ARB 24” telekanalının birgə layihəsi olan “Qida bələdçisi” verilişinin növbəti buraxılışı yayımlanıb.

 

 

- Ümumdünya Heyvan Sağlamlığı Təşkilatının məlumatına əsasən, Portuqaliya Respublikasının Leyriya dairəsində yüksək patogen quş qripi xəstəliyi qeydə alınıb. Respublika ərazisinin bu təhlükəli yoluxucu xəstəlikdən qorunması məqsədilə bu ərazidən diri quş və quşçuluq məhsullarının Azərbaycana idxalına müvəqqəti məhdudiyyət qoyulub.

 

- Artıq 11 minə yaxın iribuynuzlu heyvan identikləşdirilərək həm təsərrüfat, həm də heyvanlar haqqında zəruri məlumatlar Heyvanların İdentifikasiyası və Qeydiyyatı Sisteminə daxil edilib. 2021-ci ilin 15 dekabr tarixindən 2022-ci ilin 6 yanvarınadək identikləşdirilmiş heyvanlardan 2352-si Bakının, 8163-ü Abşeron rayonunun və 260-ı isə Sumqayıt şəhərinin payına düşüb.

 

- Son günlər uşaqlar arasında müşahidə olunan qızdırma, burun axıntısı, boğaz ağrısı, halsızlıq və digər hallara qış mövsümündə hər zaman rast gəlinsə də, pandemiya dövründə yaşadığımıza görə “COVID - 19”-dan şübhələnmək, xüsusən də gündəlik yoluxma sayında qeydə alınan artım təbii ki, valideynlərdə narahatlıq doğurur. Mövsümi xəstəliklərdən uşaqları necə qorumalıyıq? Uşaqlarda immun sistemini zəiflədən amillər hansılardır? Bu barədə qonağımız – ATU-nun "Uşaq xəstəlikləri" kafedrasının dosenti, pediatr Fəxriyyə Məmmədova ətraflı məlumat verib.

 

- Dünyada, eləcə də Azərbaycanda ürək-damar xəstəliklərindən əziyyət çəkənlərin sayı hər il artır. Ən təhlükəli hal isə xəstəliyə gənclər, uşaqlar arasında da geniş rast gəlinməsi, hətta ölümlə nəticələnməsidir. Ürək xəstəliklərinə təkan verən amillər hansılardır? Soyuq aylarda ürək-damar xəstəlikləri niyə kəskinləşir? “AQTA maarifləndirir” rubrikasında AQTİ-nin departament müdiri Nərmin Axundova və invaziv kardioloq Sara Bayramzadə ürəyi qorumaq üçün, risk amillərinin azaldılması ilə bağlı bir sıra tövsiyələri tamaşaçıların diqqətinə çatdırıb.