Üzüm budağının suyunun FAYDALARI
09.01.2022 12:52
Yazda üzüm ağacları budanılır, kəsik yerlərindən su tökülməyə başlayır. Bu, adi su deyil, çox faydalıdır, onun tərkibində vitaminlər, minerallar və fermentlər vardır.
 
Aztibb.az xəbər verir ki, həkim-fitoterapevt Fizuli Hüseynov  qeyd edib ki, üzüm kəsildikdən sonra su axan nöqtələrin altına qab qoyaraq, bu suyu toplayıb soyuducuda saxlamaq və səhər acqarına yarım stəkan içmək böyrək və öd daşlarını əridir. Sonra bu su ilə gündə 30-40 qram arası olmaq şərtilə saç diblərini islatmaq saçların gurlaşmasına, qaşınma və kəpəklənmənin aradan qalxmasına, saç tökülmənin dayanmasına səbəb olacaq.
 
Bu sudan gözə damcıladanda göz qaşınmaları, acışmaları və gözdəki qızarmalar aradan qalxır. Bundan əlavə, təzə yarpaqlayan üzüm yarpaqları yığılaraq əzilir, oynaq üzərinə qoyulub bağlanılır. Nəticədə oynaq ağrılarını götürür, oynaq duzlaşmalarında olduqca faydalı təsir göstərir.
 
Təzə üzüm yarpaqları və ya zoğlarını toplayıb ondan 2 xörək qaşığı 1 stəkan suya əlavə edərək 20 dəqiqə dəmləyib süzmək və gündə bir dəfə saçları yaxalamaq faydalıdır.
 
"Yetişməmiş üzüm meyvəsi abqora adlanır. Abqoranı yığın, şirəçəkəndən keçirib şüşə butulkalara yığın. Bu şirə şəkər xəstələri üçün çox faydalıdır. Belə ki, yeməkdən yarım saat əvvəl 1 xörək qaşığı bu şirəni 1 stəkan suya qarışdırıb içilərsə, qanda şəkər səviyyəsi yüksəlməz", - deyə fitoterapevt üzüm budağının suyunun faydalarından bəhs edib.