Ən yaxşı dəmir və B12 vitamini mənbəyi qırmızı ətdir. Ətin tərkibində amin turşular (zülal) orqanizmin "tikinti materialı"dır (boy artımı).

Aztibb.az xəbər verir ki, pediatr-neanotoloq Nurəngiz Hacıyeva bu barədə maarifləndirici məlumat paylaşıb.

Həkimin sözlərinə görə, ətdən başqa heç bir qidada bu ideal tərkib və nisbət yoxdur. 17 yaşa çatana kimi hər bir uşaq yumuruğunun ölçüsü qədər əti rasiona qəbul etməlidir (mal, qoyun, toyuq və balıq əti növbə ilə):

"Uşağın rasionuna 7 aydan gec olmayaraq ət (toyuq, hind toyuğu, balıq və mal) məhsullarını əlavə etmək lazımdır. 1 yaşdan isə qoyun əti vermək olar. Qoyun ətinin tərkibində omeqa çoxdur. İlk aylar 20 qram miqdarda maşından keçirilmiş ətlə başlayıb, 1 yaşda tədricən 100 qrama çatdırmaq olar. Uşağa 1 yaşdan xırda doğranmış ət də verilir. Ən yaxşısı 1,5−2 saat ərzində əti bişirmək və ya sobada hazırlamaqdır. Bu zaman ədviyyat və souslardan istifadəni minimuma endirmək lazımdır. Uşaqlara aid olan yeməklərdə mayonez, sirkə və soya sousu olmamalıdır. Lakin bir qədər sarımsaq və soğan əlavə etmək faydalıdır. Uşaq ət yemirsə, deməli, anlayışı yoxdur. 7 aydan qidaya ət əlavə edilirsə, uşaq mütləq bu qidanı sevəcək".