Yaşa dolduqca, zaman keçdikcə görmə qabiliyyəti ilə əlaqədar müxtəlif problemlər yaranır. Ona görə də müvafiq müalicə prosedurları tətbiq edilir. Çox vaxt isə eynək taxmaq məcburiyyəti yaranır. Həmin məcburiyyətdən yaxa qurtarmaq üçün eksimer lazer əməliyyatı aparılır. Eynəkdən azad olmaq istəyən 18 yaşdan yuxarı kəskin xəstəliklərdən əziyyət çəkməyənlər həmin əməliyyatdan faydalana bilərlər.

Respublika Neyrocərrahiyyə Xəstəxanasının həkim-oftalmoloqu Gültəkin Məmmədova deyib: “Əslində eynək məhdudiyyətdir, amma eksimer lazer əməliyyatı estetik əməliyyatdır. Heç bir həkim heç bir xəstəni buna məcbur edə bilməz. Lakin bəzi hallarda istisnalar var. Əgər iki göz arasında görmədə rəqəm fərqi varsa və eynək taxmaq problem yaradırsa, onda həmin əməliyyatı etmək olar. Bunlar nisbi göstərişlərdir”.

Eksimer lazer əməliyyatının tətbiqində xəstənin analiz nəticələri, həkim və cihaz seçimi vacib rol oynayır. Saniyələr ərzində davam edən əməliyyatdan sonra görmə qabiliyyəti bərpa olunsa da, ehtiyatı əldən verməmək məsləhətdir.

“Əməliyyatdan sonra həmişə gözü qorumaq lazımdır. Lazerlə yonulduğuna görə istər-istəməz buynuz qişanın səthi incəlir. Belə halda görmə rəqəmlərindən asılı olaraq həkimlərin tövsiyəsinə uyğun şəkildə hərəkət etmək vacibdir, əməliyyatdan sonra gözü ovxalamaq, rəngli olsa belə kontakt linzalardan istifadə etmək olmaz və gözü hər hansı zədədən də qorumaq lazımdır. Həmin məhdudiyyətlərə əməl olunmasında böyük fayda var”,- deyə həkim-oftalmoloq bildirib.

Lazer əməliyyatından sonra gözdə yaranan quruluğu aradan qaldırmaq üçün 3-6 ay, 1 il və daha çox müddətdə həkim məsləhəti ilə müvafiq dərmanlardan istifadə olunur.