Prostat vəz ağrılarını aradan qaldırmaq üçün RESEPTLƏR

15.12.2021 12:12

Prostat vəz problemləri zamanı cərrahi müdaxilənin qarşısını almaq üçün xalq təbabəti reseptlərindən istifadə etmək faydalıdır.

Aztibb.az xəbər verir ki, həkim-fitoterapevt Fizuli Hüseynovun sözlərinə görə, prostat vəz ağrıları zamanı qanda prostaqlandinlərin miqdarı artır, xəstə dinclik tapa bilmir, həmişə həyəcanlı olur, sidiyə çətin gedir və bəzən isə ikiləşmiş sidik olur. Sidiyə gedəndən sonra sidik qaldığından tam boşalma olmur. Eyni zamanda cinsi istək azalır və yavaş-yavaş itir. Axşamlar sidiyə getmə isə çoxalır, səhərə qədər dəfələrlə narahatlıq yaradır. Prostat vəz yerləşən nahiyədə güclü ağrılar olur:

"Müalicədən əvvəl prostat vəzin USM müayinəsindən keçmək və qanda “PSA total” analizi verərək müalicəyə başlamaq lazımdır. Hər 2 aydan bir yoxlanılmaqla müalicənin nəticələrini müəyyənləşdirmək olar".

Prostat üçün resept:

Prostat vəzin hiperplaziyasında (yəni böyüməsində) aşağıdakı məcundan istifadə etmək olar.

Zəncəfil kökü – 30 qram

Qarazirə toxumu – 50 qram

Xurma tozu (erkəkcikləri) – 100 qram

Ud hindi kökü – 50 qram

Novruz şaxtagülü – 20 qram

Bal (şabalıd vəya qaratikan) – 1 kq

Bitkilərin hamısı quru olmaq şərtilə qəhvəüyüdəndə üyüdülür, bir-birinə qarışdırılır. Gündə 3 dəfə yeməkdən 1 saat əvvəl 1 çay qaşığı qəbul edilir. Məcunun qatılığı və acılığı narahatlıq yaradarsa, əlavə olaraq 0.5 kq-a qədər bal əlavə etmək olar.

İstifadədən əvvəl məcunu qarışdırmaq lazımdır. Şəkər xəstələri və təzyiqi yüksək olanların istifadə etməsi məsləhət deyil və ya ehtiyatla, az miqdarda tətbiq edə bilərlər.

Fitoterapevt qeyd edib ki, məcundan istifadə edərkən ishal yaranarsa, onun miqdarı yarıbayarı azaldılmalıdır, problem yarananda isə ümumiyyətlə qəbulu dayandırılmalıdır. Çünki hər bir orqanizm fərqli xüsusiyyət daşıyır və məcunun tərkibindəki bitkilərə əks reaksiya verə bilər.

Prostat hiperplaziyasından (böyüməsindən) əziyyət çəkənlər gündə 2 saat yeyin-yeyin gəzməlidirlər. Bəzi hallarda sidiyə getmə tam dayana bilir, bu zaman 100 qram çobanyastığı çiçəklərini 2-3 litr suda 5 dəqiqə qaynadıb ilıq olana qədər gözləyib vanna etmək lazımdır. Vanna qəbulundan sonra soyuq hava zərərlidir. Vannanı yalnız məcburiyyət olanda etmək lazımdır, çünki çox isti şərait prostat böyüməsinə əks göstərişdir.

Prostat böyüməsi olanlar aşağıdakı çaydan içə bilərlər:

Bibəriyyə yarpağı – 100 qram

Fındıq yarpağı – 100 qram

Yağı otu – 100 qram

Gülümbahar – 100 qram

3 stəkan suya hərəsindən 1 dolu çay qaşığı qarışdırıb dəmləməli, gündə 3 dəfə yeməkdən 50 dəqiqə əvvəl 1 stəkan içilməlidir.