“Kəkələmənin yaranma səbəbləri müxtəlifdir. Söz bazasının azlığı və çoxluğu, müxtəlif nevroloji problemlər kəkələmə problemlərinə səbəb ola bilər”.

Aztibb.az xəbər verir ki, bu barədə  “Ondan öyrənirik” adlı layihənin “Autizm xəstəliyi nədir və necə sağalır?” mövzusuna həsr olunmuş ilk buraxılışında Sağlam Nitq Psixoloji Mərkəzinin həmtəsisçisi və rəhbəri, loqoped Ləman Kazımova bildirib.  

Həkim ev şəraitində valideynlərin diqqət yetirməli olduğu məqamlardan bəhs edib.

Bildirib ki, kəkələmənin uşaq həyəcanlandıqda və ya qorxduqda baş verməsinə, ağız aparatında, sinəsində qıcolmaların olub-olmamasına diqqət yetirmək vacibdir.

Həkimin sözlərinə görə, qıcolmalarla baş verən kəkələmələr yalnız professional dəstəklə müalicə olunmalıdır.

“Yüngül dərəcəli kəkələmələri (hər beş sözdən bir kəkələmə) valideynlər bir ay ərzində izləməli, müəyyən müdaxilələr etməlidir. Bunun üçün uşağı stresdən, həyəcanlı videolardan, qorxulu oyunlardan uzaq tutulmalı, onun normal yuxu rejiminə riayət olunmalı, qıcıqlandırıcı qidalardan (qazlı içkilər, çipslər, duzlu abur-cuburlar) imtina edilməlidir. Beyində qıcıq yaradan bu kimi amillər onun nitqinə də təsir göstərir”, - deyə L.Kazımova vurğulayıb.

O, bildirib ki, bundan əlavə, valideynlər ev şəraitində nəfəs texnikaları, düzgün nitq tərbiyəsi etməklə kəkələmənin azalmasına dəstək verə bilərlər.

Qeyd edək ki, “Ondan öyrənirik” adlı layihənin sponsoru və  informasiya dəstəkçisi Aztibb.az saytıdır.