Müxtəlif vitamin və minerallarla zəngin turşəng çox faydalı göyərtidir.

Aztibb.az xəbər verir ki, bu göyərtinin tərkibində C, K, E, B qrupu vitaminləri, biotin, beta-karotin, efir yağları, orqanik turşular, maqnezium, kalsium, fosfor, dəmir kimi minerallar var. Turşəng immun sisteminə çox müsbət təsir edir. 

Həmçinin onun tərkibində olan C vitamini orqanizmdə dəmirin mənimsənilməsinə kömək edir. Bu səbəbdən turşəngi ətlə birlikdə qəbul etmək lazımdır. Bu, ətdə olan dəmirin daha yaxşı sovrulmasına kömək edəcək.

Turşəngi və digər təzə göyərtiləri tez-tez qəbul edən insan özünün yaz avitaminozlarından qoruya bilər.

Qədim zamanlardan turşəng qadınlarda klimaks zamanı müalicəvi vasitə kimi istifadə olunurdu. Turşəngin müntəzəm qəbulu (təbii ki, az miqdarda) klimaksın xoşagəlməz simptomlarını azaldır.

Turşəng həzm proseslərinə çox müsbət təsir edir, qəbizliklə mübarizə edir. Lakin mədə şirəsinin turşuluğunun artması ilə müşayiət olunan qastritlər zamanı bu göyərtini yemək tövsiyə edilmir.

Qidalı liflərlə zəngin olan turşəng bağırsaqları orada yığılan şlaklar və toksinlərdən yaxşı təmizləyir.

Turşəng iltihabəleyhinə, antitoksik təsirə malikdir.

Tərkibində olan turşəng turşusu qan damarlarını xolesterindən təmizləyir, onların elastikliyini artırır.

B qrupu ilə zəngin olan turşəng sinir sistemi üçün faydalıdır, orqanizmdə hüceyrələrin yenilənməsini sürətləndirir.

Bütün bu faydalı xüsusiyyətlərə baxmayaraq bəzi xəstəliklər zamanı turşəngin qəbulu insana zərər vura bilər. Belə ki, turşəngin çoxlu miqdarda qəbulu böyrəklərdə daşların əmələ gəlməsinə səbəb ola bilər. Həmçinin turşəngin həddindən artıq miqdarda qəbulu orqanizm tərəfindən kalsiumun sorulmasını ləngidir.

Böyrək xəstəlikləri, mədə şirəsinin turşuluğunun artması ilə müşayiət olunan qastrit, xora xəstəliyi, bəzi bağırsaq xəstəlikləri və iltihabları, orqanizmdə su-duz balansının pozulması, podaqra xəstəliyi zamanı turşəngi qəbul etmək olmaz.