Aztibb.az xəbər verir ki, seminarda Mərkəzi Klinikanın Süni mayalanma şöbəsinin müdiri, Əməkdar həkim, cərrah-ginekoloq, tibb üzrə fəlsəfə doktoru Mahirə İsmayılova Tibb fakültəsinin tələbələrinə ustad dərsi keçib.

 

Əvvəlcə Tibb fakültəsinin dekanı, biologiya üzrə fəlsəfə doktoru, dosent Elsever Əsədov çıxış edərək tələbələrin təcrübi bacarıqlarının qiymətləndirilməsində bu cür dərslərin mühüm əhəmiyyət daşıdığını qeyd edib.

 

Daha sonra Ümumi təbabət və klinik fənlər kafedrasının müdiri, tibb üzrə fəlsəfə doktoru, dosent Gültəkin Əliyeva 13 elmi işin həmmüəllifi, süni mayalanma, doğuş, hamiləlik və qadın xəstəlikləri mütəxəssisi olan Mahirə İsmayılova haqda məlumat verib. Bildirib ki, cərrah-ginekoloq artıq bir ildir ki, muxtar respublikaya gələrək xəstələrin qəbulu, müalicəsi və süni mayalanma əməliyyat prosedurlarının həyata keçirilməsində iştirak edir.

 

Seminarda Mahirə İsmayılova sonsuzluğun müalicəsində köməkçi reproduktiv texnologiyaların rolundan danışıb. Sonsuzluğun səbəbləri və ona təsir edən amillər haqda tələbələrə slayd vasitəsilə əyani məlumat verib.

 

“Müalicə işi” ixtisası üzrə yuxarı kurs tələbələrinin iştirak etdiyi dərsdə müəllim və tələbələrin mövzu ilə bağlı sualları cavablandırılıb, onlara Mərkəzi Klinikanın maarifləndirici broşür və bukletləri paylanılıb.

 

Qeyd edək ki, mama-ginekoloq Mahirə İsmayılova Naxçıvanda anadan olub. Azərbaycan Tibb Universitetinin məzunudur. O, 1996-2001-ci illərdə Elmi Tədqiqat Mamalıq və Ginekologiya İnstitutunda işləyib. 2007-ci ildən indiyədək Mərkəzi Klinikada Qadın Mərkəzinin müdiridir.