ABŞ-ın San Dieqo şəhərinin bioloqları bəzi neyro xəstəliklərinin müalicəsində müəyyən beyin bölgələrində ölən sinir hüceyrələrini yenidən əmələ gələn neyronlarla əvəz ediblər.

Aztibb.az wienerzeitung.at-a istinadla xəbər verir ki, alimlər Parkinson xəstəliyinin simptomlarını azaltmaq üçün heyvanlar üzərində aparılan təcrübələrdə buna nail olublar. Dopamin istehsal edən neyronlara yenidən proqramlaşdırılmış astrositlər vasitəsilə siçanlarda xəstəlik üçün tipik olan hərəkət pozğunluğu aradan qaldırılıb.

“Sadə bir üsulla bu qədər neyron istehsal edə bildiyimizə çox təəccübləndik”, - deyə bioloq Xiong Dong Fue bildirib.

Əvvəllər digər tədqiqatçıların kök hüceyrələrindən neyronlar yaratmaq və zədələnmiş beyin toxumalarını bərpa etmək üçün cəhdləri nəticə verməyib. X.D. Fue və həmkarları təsadüfən birləşdirici toxuma hüceyrələrinin müəyyən bir gen söndürüldükdə sinir hüceyrələrinə çevrildiyini kəşf ediblər. Bu gen RNT molekullarına yapışan və bununla da genləri aktivləşdirə və ya təsirsiz hala gətirə bilən PTB zülalının istehsalı üçün məlumat daşıyır.

Parkinson xəstələri üçün xarakterik olan yavaş hərəkətlər, titrəmələr və qeyri-sabit yeriş kimi hərəkət pozğunluqlarına dopamin çatışmazlığı səbəb olur. Əvvəlcə tədqiqatçılar siçanlardan və insanlardan astrosit yetişdirdikləri hüceyrələrdən başlayıblar. Genetik cəhətdən dəyişdirilmiş viruslar əlavə edərək, DNA molekullarını hüceyrələrə köçürüblər, daha sonra PTB genini bloklayan RNT molekulları yaradıblar. Bu isə neyronlara xas olan bir neçə inaktiv astrosit genlərini aktivləşdirib, yaradılan neyronlar meydana gətirib və orta beyində dopamini normal səviyyəyə qaldırıb. Bununla da heyvanlarda hərəkət pozğunluğu üç ay müddətində aradan qaldırılaraq bərpa olunub.