Bu gün ölkə hüdudlarından kənarda, dünyanın inkişaf etmiş ölkələrinin nüfuzlu xəstəxanaları və tibb müəssisələrində onlarla həmyerlimiz çalışır. Onlar xarici ölkələrdə Azərbaycanı təmsil etməklə yanaşı, həm də uğurlu həkimlik fəaliyyəti ilə seçilirlər. 

Aztibb.az xəbər verir ki, belə həkimlərdən biri də daxili xəstəliklər və təcili tibbi yardım mütəxəssisi olan Elvin Hüseynovdur.

E.Hüseynov Almaniyanın Köln şəhərindəki Augustireninnen xəstəxanasının Ağciyər xəstəlikləri, Allerqologiya, süni tənəffüs və yuxu təbabəti klinikasının şöbə müdiri, aparıcı mütəxəssis həkimidir. 

O, Azərbaycan Tibb Universitetinin Müalicə-profilaktika fakultəsini bitirib, sonra Köln Universitetinin Tibb fakultəsində təhsilini davam etdirib.  “İşemik insultlarda mexaniki trombektamiya: çıxarıcı stentlərin uzunluğunun reperfuziyaya və klinik nəticəyə təsiri” mövzusunda doktorluq dissertasiyası müdafiə edib.

"Endokrinoloji təcili situasiyalar" və "Maye və elektrolit pozuntuları" mövzusunda elmi məqalələrin müəllifi, Nordrhein həkimlər birliyinin üzvüdür.

Almaniya ağciyər xəstəlikləri cəmiyyətinin iyun ayında keçirilmiş illik konqresində çıxış edib.

2009-cu ildən Almaniyada yaşayan E.Hüseynov Almaniyadakı Azərbaycan icmasının fəal üzvlərindəndir.