Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının şöbə müdiri, tibb elmləri doktoru Nuran Abdullayevin universitet üzrə baş koordinatoru olduğu daha bir elmi tədqiqat işi dünyanın ən aparıcı elmi jurnallarından hesab olunan "Radiology"də (impakt faktor 29.146) çapa qəbul edilib.

Aztibb.az xəbər verir ki, bu barədə Nuran Abdullayev sosial şəbəkədə məlumat verib.

"Trombektomiyaya qarşı təcrid olunmuş ön serebral arteriya insultunun tibbi müalicəsi: beynəlxalq çoxmərkəzli reyestr araşdırması" adlı tədqiqatımız dünyada ilk dəfə elmi baxımdan sübut edir ki, bizim işemik insult xəstələrində ilk saatlarda icra etdiyimiz əməliyyatlar nəinki beynin böyük damarlarında, eləcə də çox kiçik distal damarlarında da effektlidir", - deyə N.Abdullayev bildirib.

Həkim qeyd edib ki, əməliyyatla əldə edilən bu önəmli müsbət nəticə bu günə qədər təkcə dərmanla müalicə olunan bu tip xəstələrdə alınan nəticədən dəfələrlə yüksəkdir.

"Elmi tədqiqatımızı Avropanın, Amerika və Asiyanın tanınmış elm adamları - neyroradioloqları ilə birgə aparmışıq. Mübaliğəsiz deyə bilərəm ki, tərəfimdən göstərilən bu cür fəal və peşəkar elmi fəaliyyət institumuzun tarixində bir ilkdir. Bu tədqiqat nəticəsində işemik insult xəstələrinin dünyada müalicəsi üçün qəbul edilən qızıl standartlarına dəyişiklik ediləcək", - deyə N.Abdullayev qeyd edib.