"İnsan orqanizminin hər bir hissəsi özünə xas bioloji komponentlərdən ibarətdir. Bədənimiz zədənin növünə görə fərqli reaksiya verir, lakin ən çox görülən reaksiyalardan biri də qaysaqdır. Qaysaq prosesi isə zədələnmədən dərhal sonra qanaxma ilə başlayır".

Aztibb.az xəbər verir ki, bunu fleboloq-cərrah İsmayıl Əsgərov yaralar və onların sağalma prosesindən danışarkən deyib.

Onun sözlərinə görə, qabıq mikroblardan qorunmaq üçün bədənin təbii müdafiəsidir. 

"Xüsusi qan hüceyrələri, trombositlər dəridə "açılış" olan anda hərəkət edir. Trombositlər bir yerə toplaşaraq, yara üçün sanki qoruyucu geyim formalaşdırır. Bu geyim yarada bioloji sarğı əmələ gətirir və qanaxmanı dayandırır. Qoruyucu bandaj zamanla quruyur, sərtləşir və qabığa çevrilir. Qabıq bağlama, sağalmağa doğru gedən yola işarədir. Amma əslində qabıq, mikroblardan qorunmaq üçün bədənin təbii müdafiəsidir. Yəni onların əsas vəzifəsi yaranı sağaltmaq deyil. Qabıq quruyur, ölü hüceyrələrə maneə yaradır və sağalma prosesini ləngidir. Bəzən qabığın alt hissəsindən toxumaların dərininə doğru gedən irinləmə başlayır".

O, bildirib ki, trofiki xoranın meydana çıxma səbəbini araşdırmadan yaraya "mazlar" sürtmək olmaz.

"Görüntü olaraq bütün yaralar oxşar olsa da, hər yara hər bədəndə fərqlidir. Xüsusən kəskin deyil də, xroniki yaralarda bu fərqliliklər açıq-aydın müşahidə olunur. Xroniki yara, başqa sözlə trofiki xora müşahidə etdikdə onun meydana çıxma səbəbini araşdırmadan lazımsız "mazlar" yaraya sürtmıyin.

"Ən çox əziyyət çəkdiyimiz autoimmun-revmatik mənşəli yaralardır. O cümlədən, kompensasiya olunmayan orqan xəstəlikləri, məsələn ağir dərəcədə ürək çatışmazlığı, qaraciyər çatışmazlığı kimi hallarda da yaraların sağalmasına ciddi maneəçilik əmələ gəlir. Yara bir quru qərtmək deyil, o qara nöqtə vahid orqanizmin ifadəsidir, - deyə, həkim vurğulayıb.