Bakı Baş Səhiyyə Mərkəzinin strukturuna daxil olan 14 nömrəli Şəhər Poliklinikasının həkim-nevroloqu Təranə Həşimova Aztibb.az-a bildirib ki, boyun ağrıları müxtəlif səbəblərdən yarana bilər. Onurğanın degenerativ xəstəlikləri, travmalar, fəqərələrdə deformasiyaların olması bu kimi ağrıların yaranmasına səbəb ola bilər:

“Bəzən boyun ağrıları həm boyun, həm də çiyin nahiyəsində olan nevralgiyalarla müşayiət olunur. Belə ki, boyun-çiyin nevralogiyası, əsasən, boyun-bazu kələfi sinirlərinin tez-tez rast gəlinən nevrolgik formasıdır. Əsasən bu kimi ağrılar boyun-çiyin ətrafında, kürək üstündə, qolda və hətta əl barmaqlarınadək yayılan kəskin xarakterli ola bilər və xəstənin demək olar ki, əmək qabiliyyətini məhdudlaşdırır”.

 

Onun sözlərinə görə, ağrılar adətən gecələr daha çox şiddətlənir, kəsici və göynədici xarakterli olur. Xəstə yatarkən qolunun, boynunun və hətta başının vəziyyətini dəyişməsi boyunda olan ağrıların kəskinləşməsinə yol aça bilər.

 

Nevroloq qeyd edib ki, boyun fəqərələrinin osteoxondrozu, şişləri, epidural abseslər, çiyin-kürək periartriti, bazu oynağının çıxığı, sınığı, müxtəlif revmatik xəstəliklər, skleroz kimi müxtəlif xəstəliklərdən də onurğa boyunca və boyun nahiyəsində ağrı ola bilər.

 

T.Həşimova boyun ağrılarının müayinə və müalicə üsullarına da toxunub. Bildirib ki, bütün bu simptomları nəzərə alaraq, xəstəni hərtərəfli müayinə etmək lazımdır. Xüsusən, rentgen, kompüter tomoqrafiyası, əgər lazım olarsa, maqnit rezonans tomoqrafiyasından da istifadə etməklə diaqnozun qoyulması mümkündür. Eyni zamanda, qanın ümümi analizi, revmatik sınaqlar kimi yanaşı müayinələr də edilir. Müayinə müddəti bitib artıq diaqnoz qoyulduqdan sonra müalicəyə başlanılır. Müalicə həm konservativ, həm də operativ ola bilər. Müalicə isə hər diaqnoza uyğun müxtəlif formada aparıla bilər. Əgər ağrıların səbəbi fəqərələrarası yırtıq, törəmələrin olması və ya travmalar nəticəsində sınıq olarsa, artıq ixtisaslı həkimə yönləndirilib müalicəsini davam etdirmək lazımdır.