Azərbaycan Tibb Universitetinin (ATU) Şüa diaqnostikası və terapiyası kafedrasının əməkdaşları tərəfindən “Şüa terapiyası” adlı yeni dərs vəsaiti çapdan çıxıb. Tibb Universitetinin tələbələri üçün nəzərdə tutulmuş vəsait tədris proqramına uyğun tərtib olunub.

 

Aztibb.az xəbər verir ki, vəsaitin müəllifləri - ATU-nun Şüa diaqnostikası və terapiyası kafedrasının müdiri, professor Məlahət Sultanova, tibb üzrə fəlsəfə doktorları Gülşən Əliyeva və Aytən Agamalıyevadır. Rəyçilər Azərbaycan Respublikası Səhiyyə Nazirliyi Milli Onkologiya Mərkəzinin Şüa terapiyası şöbəsinin rəhbəri, professor İsa İsayev və ATU-nun Şüa diaqnostikası və terapiyası kafedrasının dosenti Mətanət Pənahovadır.

 

Yeni nəşr hər sistemdə, anatomik zonada çox və ya nadir rast gəlinən bədxassəli şişlərin şüa müalicəsini geniş əks etdirir.

 

Qeyd edək ki, şüa terapiyası haqda ilk dərslik isə 1982-ci ildə professor B.Ə.Baxşıyev tərəfindən yazılaraq 2004-cü ildə təkrar nəşr olunub. Müasir onkoradiologiya 3D ölçülü sistemlər əsasında şüalandırma, şüa dəstəsinin intensiv modulyasıyası, xəstələrin immobilizasiya texnologiyasının təkmilləşməsi, konform şüalanmanın istifadəsi kimi yenilikləri özündə əks etdirir. Bu yenilikləri özündə birləşdirən və dərs proqramı əsasında tərtib edilmiş mənbəyə ehtiyac duyulması səbəbindən dərs vəsaiti tələbələrə təqdim olunur.

 

Vəsait ümumi və xüsusi hissələrdən ibarətdir. Ümumi hissədə ionlaşdırıcı şüaların tarixi, şüa müalicəsinin fiziki, bioloji və texniki əsasları əhatəli və sistemli şəkildə öz əksini tapıb. Xüsusi hissədə çox təsadüf edilən bəzi şişlərin şüa terapiyasının əsasları yer alıb.