Aztibb.az xəbər verir ki, budəfəki buraxılışda da aktual və maraqlı mövzulara toxunulub:

 

- Türkiyə ilə qida təhlükəsizliyi sahəsində əməkdaşlıq daha da genişlənəcək. AQTA sədri Türkiyənin kənd təsərrüfatı və meşəçilik naziri ilə görüşüb. Qarşılıqlı əməkdaşlığa dair iki qurum arasında bir sıra sənədlər imzalanıb.

- Rusiyaya alma ixracı artıb. Belə ki, daha 5 müəssisə də alma məhsulunu Rusiyaya ixrac edə biləcək. Qeyd edək ki, bu günədək Rusiyanın müvafiq qurumu tərəfindən ümumilikdə 70 alma istehsalı müəssisəsindən bu ölkəyə məhsul ixracına icazə verilib. Hazırda Rusiya Federasiyasına alma ixracına icazə verilmiş müəssisələrin ixrac potensialı 153 397 ton təşkil edir. Bu da ötən il Rusiyaya ixrac olunan 66 924 ton alma məhsulunun 229 %-i həcmindədir.

- Respublika ərazisində karantin obyekti olan zərərli orqanizmlərin yayılmasının qarşısının alınması və mübarizə tədbirlərinin təşkili məqsədilə fitosanitar monitorinqlər keçirilir.

- Kafe-restoranlar artıq yeni qaydalarla işləyəcək. Belə ki, oktyabrın 1-dən etibarən yalnız hər iki vaksin dozasını qəbul etmiş şəxslər ictimai iaşə müəssisələrinə daxil ola bilərlər.

- Paytaxtda və müxtəlif bölgələrdə qida təhlükəsizliyi tələblərinin və istehlakçı hüquqlarının pozulması hallarının qarşısının alınması məqsədilə monitorinqlər keçirilib. Aşkarlanmış qanun pozuntularına qarşı qanunvericiliyin tələbinə uyğun tədbirlər görülüb.

- Heyvanların identifikasiyası heyvan mənşəli məhsulların təhlükəsizliyini təmin etmək baxımından olduqca vacib və zəruri amildir. Hazırda ölkəmizdə heyvanların identifikasiyası və qeydiyyatı sisteminin yaradılması prosesi həyata keçirilir. Qonağımız AQTA-nın Heyvan sağlamlığı şöbəsinin müdiri, respublikanın baş dövlət baytarlıq müfəttişi Qalib Əbdüləliyev identifikasiya sisteminin rolu barədə ətraflı bəhs edib.

- Hazırda dünyada hər il quduzluq xəstəliyindən minlərlə insan dünyasını dəyişir. İnsanları quduzluqla yoluxduracaq heyvanların əhatə dairəsi çox genişdir. İnsanın yoluxma mənbəyi isə əsasən itlər və pişiklərdir. Bəs, bu təhlükəli xəstəlikdən necə qoruna bilərik? “AQTA maarifləndirir” rubrikasında AQTİ-nin Heyvan sağlamlığı şöbəsinin mütəxəssisi, baytar həkim Çiçək Əliyeva və həkim Fəxriyyə Əhmədova bu barədə geniş məlumat verib.

 

Qeyd edək ki, “Qida bələdçisi” hər həftənin bazar günü saat 19:20-də "ARB 24" telekanalında yayımlanır.