"Böyrək daşının zərər vermədiyi hallarda xəstələrə bol maye və hərəkət etmələri məsləhət görülür. Maye və hərəkət daşın düşməsini asanlaşdırır. Bu zaman ərzində bəzi dərmanlar da qəbul edilə bilər".

Aztibb.az xəbər verir ki, bu barədə nefroloq Barat Yusubov sosial şəbəkədə məlumat verib. 

Həkimin sözlərinə görə, böyrək daşı düşdüyü zaman bunun ağrısız keçməsi imkansızdır. Amma böyrəkdən sidik süzülmürsə və ya daş sidiklə düşməyəcək qədər böyükdürsə, deməli başqa müdaxilələrlə daş çıxarılmalıdır. 

"Əlbəttə ki, pasientdə yuxarıda göstərilən problemlər (daş ölçüsünün böyüklüyü və s.) olmazsa belə, ağrı çəkmək və daşın düşməsini gözləmək istəmirsə, həkim müayinəsi olunub, göstərişə görə daşın çıxarılmasına tibbi müdaxilə edilə bilər", - deyə Barat Yusubov bildirib.