Türkiyədə yaşayan 68 yaşlı Duriyə Dəmirdövən bir il öncə xəstəliyi səbəbindən xüsusi bir xəstəxanaya yerləşdirilir.

Qaraciyər xərçəngi diaqnozu qoyulan qadın şikayətləri artdıqdan sonra Ege Universiteti Xəstəxanasına köçürülür.

Aztibb.az xəbər verir ki, 3 ay əvvəl həkimlər yaşlı qadına təcili orqan nəqli ilə bağlı qərar verir. D.Dəmirdövənin bütün övladları analarının yaxşılaşması üçün qaraciyər toxumalarını bağışlamaq istədiyini bildirirlər. Lakin övladlarının qanı və toxumaları uyğun gəlmədiyi üçün onlardan toxuma transplantasiyası məqsədəuyğun hesab edilmir.

Sağlamlığı gündən-günə pisləşən qadına 40 yaşındakı kürəkəni Özgür Güləç qaraciyər toxumasını bağışlamaq fikrini bildirir. Müayinələrdə qan qrupları eyni olan Ö.Güləçin qayınanasına qaraciyər toxuması verməsinin mümkün olduğu müəyyən edilir.

Ege Universiteti Orqan Nəqli Tətbiq və Araşdırma Mərkəzində əməliyyatdan sonra D.Dəmirdövən sağlamlığına qovuşub.

“Kürəkənim sayəsində sağlamlığıma döndüm. Mənə “Ana, sənə qaraciyərimi vermək istəyirəm” deyəndə şok oldum və təsirləndim. Övladlarım və nəvələrimlə zaman keçirmək üçün çox darıxmışam. Çox xoşbəxtəm, sağlamlığıma qovuşdum”,– deyə D.Dəmirdövən bildirib.

"Qaraciyər toxumamı düşünmədən qayınanama bağışlamaq istədim. Çünki o mənim anamdır. Sağlamlığına qovuşduğuna görə çox xoşbəxtəm. Transplantasiya əməliyyatından sonra yaxşıyam. Həyat qurtarmaq çox gözəl bir hissdir”, – Ö.Güləç söyləyib. Əməliyyatlarında iştirak edən həkimlər – Murad Zeytunlu və Alpər Uğuz uğurlu cərrahiyyədən sonra hər ikisinin sağlamlıq vəziyyətinin çox yaxşı olduğunu bildiriblər.