Pullu dəmrovun bitkilərlə müalicəsi - RESEPT - aztibb.az AZƏRBAYCANIN SƏHİYYƏ XƏBƏR PORTALI

Pullu dəmrovun bitkilərlə müalicəsi - RESEPT

13.06.2021 13:09

Pullu dəmrov (psoriaz) dirsək, diz, baş, bel, bəzən qarının dərisində baş versə də, o, təkcə dəri patologiyası deyil, bütün bədənin xəstəliyidir. Bu səbəbdən də dəri müalicəsi ilə paralel olaraq daxili orqanların da müalicəsi aparılmalıdır.

Aztibb.az xəbər verir ki, bu barədə həkim-fitoterapevt Fizuli Hüseynov məlumat verib.

O, bildirib ki, psoriaz xəstələri ağ çörəkdən, konserv məhsullarından, alkoqol və siqaretdən tamamilə imtina etməli, qidasında ət yeməklərini azaltmalı, tərəvəzləri çiy şəkildə və ya salatlar formasında yeməyə üstünlük verməlidirlər. Əsəb gərginliyi və stres bu xəstəliyin kəskinləşməsinə səbəb olur. Əsəbləri sakitləşdirmək üçün uzun müddət dazıotu dəmləməsi içilməlidir. Xəstəliyin müalicəsi qaraciyərdən başlamalıdır.

Qaraciyər üçün məcunun hazırlanması:

Alaqanqal – 50 qram

Çörəkotu – 30 qram

Udi hindi – 30 qram

Sarıkök – 50 qram

Zəncəfil – 30 qram

Dəmrovotu – 30 qram

Bal – 1.2 kq

İstifadə qaydası :

Məcundan gündə 3 dəfə yeməkdən əvvəl 1 çay qaşığı yeyilməsi qaraciyərin fermentativ aktivliyini gücləndirir. Məcun acı və ya quru alındıqda əlavə olunan balın miqdarını 1.5 kq-a qədər artırmaq olar.

Psoriaz zamanı bağırsaqların mikroflorasının normal olmasının böyük əhəmiyyəti vardır. Bunun üçün ən ideal vasitə Qafqaz kefiridir. Gündə 2 dəfə, günorta və axşam, yemək zamanı 1 stəkan kefir içmək, hər ayın tamamında 10 gün fasilə vermək lazımdır. Kefir ev şəraitində, təzə sağılmış inək südündən hazırlandıqda onun probiotik tərkibi daha zəngin olur.

Psoriaz zamanı həftədə 2 dəfə oruc tutulmalıdır, çünki aclıq xəstəliyin aktivliyini azaldır. Çay, qəhvə, qazlı içkilər əvəzinə adi çiy sudan istifadə olunmalıdır. Psoriaz xəstəliyi olan adamlar yatanda başlarının altına hündür yastıq qoymalıdırlar, başı alçaq edib yatmaq xəstəliyi daha da artırır.

Psoriaz mazı:

Psoriaz üçün səpgiləri əhəmiyyətli dərəcədə azaldan maz var. Məlumat üçün mazın tərkibini yazıram : naftalan nefti (təmizlənmiş), ardıc qətranı, lanolin, dəmrovotu, udi hindi, yatıqqanqal, gülümbahar və zeytun yarpağının sulu ekstraktları, təmizlənmiş solidol.

Yaxşı olar ki, bu mazı vurmazdan 2 saat əvvəl səpgilərin üstünə təbii alma sirkəsi vurulsun, sonra bu maz istifadə olunsun. Naftalan nefti nemətdir, psoriazlı xəstələrə naftalan vannaları qəbul etmək faydalıdır. Psoriaz xəstələrinə hər 3 aydan bir hicama etdirilir. (Bu arada dəmrovun 4 növü məlumdur : Çəhrayı dəmrov, Kəmərləyici dəmrov, Əlvan dəmrov, Saçqıran dəmrov.) Maraqlı olsa onlar haqqında da paylaşım edərəm.