Koronavirus pandemiyası başa çatdıqdan sonra insanlarda gigiyenik qaydalara ciddi əməl etmək vərdişləri yaranacaq.
Aztibb.az xəbər verir ki, bu fikirləri “AzTV”də yayımlanan “Hədəf” analitik-informasiya proqramında çıxışı zamanı Tibbi Ərazi Bölmələrini İdarəetmə Birliyi (TƏBİB) Tibbi xidmətlər departamentinin rəhbəri Firəngiz Əliyeva səsləndirib.
O, qeyd edib ki, pandemiyadan sonra insanların səhhətində bir qədər naxoşluq yarandıqda əllərini tez-tez yumağa və maskadan istifadə etməyə üstünlük verəcəklər.
TƏBİB rəsmisi əlavə edib ki, artıq dünyanın bir sıra ölkələrində uşaqlara məktəbə daxil olarkən dezinfeksiya məhlullarından və maskadan istifadə vərdişləri aşılanıb.
F.Əliyeva ölkəmizdə uşaqlara bu kimi vərdişləri aşılamaq üçün görüləcək tədbirlərdən də danışıb. Onun sözlərinə görə, bu məqsədlə uşaqların diqqətini cəlb edəcək vasitələrdən istifadə etmək olar.
“Cizgi film qəhramanlarının əks olunduğu maskalar uşaqlarda məcburiyyət hissi yaratmadan maska taxmağa marağı artıra bilər”, -deyə F.Əliyeva vurğulayıb.
