Aztibb.az xəbər verir ki, bunu Azərbaycan Tibb Universitetinin (ATU) Klinik Diaqnostik Laboratoriyasının şöbə müdiri, Tibbi mikrobiologiya və immunologiya kafedrasının baş müəllimi, t.ü.f.d. Yavər Hacısoy bildirib.

 

Onun sözlərinə görə, məhz vaksinasiya ilə müxtəlif epidemiya və pandemiyaların qarşısının alınması mümkün olub. Buna misal olaraq, hazırda yox dərəcəsinə gəlib çıxan çiçək xəstəliyini qeyd etmək olar.

 

“Bütün infeksiyaların profilaktikasında peyvəndləmə mühüm rol oynayıb. Koronavirusa qarşı kütləvi peyvəndləmənin əhalidə bu qədər qorxu yaratması isə sadəcə təəssüf doğrur. Axı bütün dünyada, eləcə də Azərbaycanda hər bir insan anadan olan kimi o, mütləq şəkildə bəzi xəstəliklərə qarşı peyvəndlənir. Bu proses yetkinlik yaşına kimi davam edir. Amma bu zaman “peyvəndlərdən qorxuram”, “bu vaksin məni öldürəcək” kimi yanaşmalar görmürük. Koronavirus pandemiyası dövründə bəzi insanların ortaya atdığı əsassız fikirlər insanların, cəmiyyətin beynini qarışdırır”, - deyə Yavər Hacısoy əlavə edib.

 

Mikrobioloq alim vaksinlərin fəsadları, yan təsiri ilə bağlı qorxuların əsassız olduğunu bildirib. Qeyd edib ki, müasir dövrdə yan təsiri olmayan hansısa preparat yoxdur. Gündəlik həyatda demək olar ki, hər gün müxtəlif tərkibli ağrıkəsicilər, təzyiq dərmanları, dərmanlar qəbul edən insanlar kifayət qədərdir. İstənilən dərmanın təlimatını oxuduqda, onun müəyyən qədər yan təsiri olduğunu görmək olar: "Amma insanlar heç buna fikir vermirlər. Bir həkim yoldaşımızın da qeyd etdiyi kimi, vaksinin yan təsiri aspirinə nisbətən daha azdır. Halbuki indiki dövrdə bir çox insan asanlıqla bu dərmanı içsə də, vaksinləşməyə tərəddüd edir”.

 

Yavər Hacısoy bu günə qədər vurdurduğumuz ənənəvi vaksinlərin də bəzən kimlərəsə yan təsiri olduğunu xatırladıb. Qeyd edib ki, belə faktlar elmi məqalə və araşdırmalarda da öz əksini tapıb. Nəticə olaraq peyvənd vurdurmağın mütləq olduğunu deyə bilərik.

 

"Vaksinlərin allergiya vermə ehtimalı təbii haldır. Çünki istənilən antibiotikin kiçik dozası bəzi orqanizmlərdə allergik hal yarada bilər. Vaksin isə mikrobun öldürülmüş bir hissəsi olduğuna görə, bədənin ona da allergiya verməsi ola bilər. Təbii ki, bu fərdi xarakter daşıyır. Vaksinin kimdə allergiya verə biləcəyini əvvəlcədən təyin edən analiz yoxdur. Ona görə də vaksinasiya aparılan bütün məntəqələrdə gözləmə otaqları, şok otaqları yaradılıb. Peyvənd preparatının kiməsə yan təsirinin ilk 30 dəqiqə ərzində ola biləcəyi ehtimalını nəzərə alaraq, peyvənd olunanlar bu müddətdə gözlədilməlidir", - deyə həkim bildirib.