Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının şöbə müdiri, tibb elmləri doktoru Nuran Abdullayevin insult xəstələri ilə bağlı elmi tədqiqatı Avropada nevrologiya sahəsi üzrə nüfuzlu jurnallardan biri kimi tanınan "European Journal of Neurology"də nəşrə qəbul edilib.
Aztibb.az xəbər verir ki, bu barədə N.Abdullayev sosial şəbəkədə məlumat verib.
Qeyd edək ki, "European Journal of Neurology" Avropa Nevrologiya Akademiyasının rəsmi jurnalıdır və orada dərc edilən elmi tədqiqatlar elmi yenilikləri ilə fərqlənməklə yanaşı, eyni zamanda Avropada elmin istiqamətini də bəlli edir.
"Bugünkü gün bir azərbaycanlı kimi bunu bacarmaq və dünyanın ən tanınmış elm adamları ilə bir sırada dayanmaq sadəcə qürurvericidir. Elmi tədqiqatımız gənc insult xəstələrindəki effektiv beyin əməliyyatlarımızın uğurlu icrasından və faydalı kliniki nəticələrindən bəhs edir", - deyə N.Abdullayev vurğulayıb.
