Tibb Universitetində yeni şöbə yaradılıb
23.04.2021 13:56
Azərbaycan Tibb Universitetinin (ATU) rektoru, professor Gəray Gəraybəylinin əmri ilə universitetin nəzdində Tibb təhsili və innovasiya şöbəsi yaradılıb.
 
Aztibb.az xəbər verir ki, şöbənin müdiri ATU-nun yetirməsi Aynur Orucova təyin olunub.
 
Yeni yaradılmasına baxmayaraq, artıq Tibb təhsili və innovasiya şöbəsi tam gücüylə fəaliyyət göstərir. Şöbə əsasən dərslərin yeni hazırlanma metodikaları, müəllim və tələbə yerdəyişməsində dəyişikliklər, interaktiv proqramlar, tələbələrdə analitik düşüncə və peşəkarlığın inkişaf etdirilməsi, mühazirələr, təcrübə və simulyasiya dərslərinin keyfiyyətinin yüksəldilməsinə nail olmağı nəzərdə tutur.
 
Qeyd edək ki, şöbənin müdiri Aynur Orucova 2012-ci ildə ATU-nun Stomatologiya fakültəsini bitirib. 2016-2019-cu illərdə Fransanın Strasburq Universitetinin Dental cərrahiyyə fakültəsində "Biomühəndislik" ixtisası üzrə magistr təhsili alıb. 2019-2020-ci illərdə isə həmin universitetin Tibb fakültəsində "Tibb elmlərində təhsil metodikası" üzrə magistr təhsili alıb. Bu müddət ərzində Strasburq Universitetinin nəzdindəki bir sıra klinika və laboratoriyalarda tədqiqatlar aparıb. A.Orucovanın “Diş kanal doldurucularının fiziki və kimyəvi xüsusiyyətləri” mövzusundakı diplom işi Strasburq Universitetinin Dental cərrahiyyə fakültəsində tədris proqramına daxil edilib.