Texnologiyaların inkişafı səhiyyə sahəsində xəyal edilənləri aşmaqdadır. Günümüzdə tibbin gen tədqiqatları sayəsindəki inanılmaz inkişafını nəzərə alsaq, bu gedişlə gələcəkdə bir insanın hansı yaşda hansı xəstəliyə tutula biləcəyini öncədən bilmək təəccüblü olmayacaq. Odur ki, robot həkimlərin əməliyyat otaqlarında işə başlamalarına çox az qalıb.
Aztibb.az xəbər verir ki, hətta məlumatların süni intellektə əsaslanmaqla təhlili, eləcə də effektiv idarəçilik yöntəmi ilə tibbdə məlum diaqnoz səriştəsizliyini də aradan qaldırmaq mümkün olacaq. Dünya sağlıq sektorunda rəqəmsal inqilabın təfərrüatlarına nəzər salsaq, irəliləyişlərin həm xəstələrin, həm də səhiyyə işçilərinin həyatına əhəmiyyətli töhfə olduğunu görərik.
Mərkəzləşmiş şəkildə pasiyent qəbulu və tibbi xidmətlərin təşkili günümüzün səhiyyə sistemi üçün ən uğurlu nümunədir. Tibbi personal üçün xəstələrin sağlamlıq tarixçələri, test nəticələri və diaqnozlarının tez bir zamanda əlçatan olması, bununla yanaşı xəstələrin vaxtında səhiyyə xidmətlərindən asan yararlana bilməsi sistemin üstünlüyünü bir daha sübut edir. Rəqəmsal mühitdə baş verən bu işbirliyi həm pasiyent-həkim münasibətlərinin müsbət tənzimlənməsində əhəmiyyətli rol oynayır, həm də xəstəliklərin vaxtında qarşısının alınmasına effektiv şərait yaradır.
Gələcəkdə tibb müəssisələri vətəndaşlara yüksək xidmət göstərmələri üçün öz fəaliyyətlərində məhz bu kimi rəqəmsal transformasiya layihələrini tətbiq etməli, buna görə də süni intellektin imkanlarından yararlanmağı hədəfləməlidir. Beləcə süni intellekt sayəsində robot həkimlər əməliyyat otaqlarında işə başlayacaq, insan hansı yaşda və hansı xəstəliyə tutulacağını öncədən biləcək, xəstələr diaqnozun nəticələrini fiziki olaraq həkimə müraciət etmədən alacaq, xəstəxanaya getmədən uzaqdan müayinə, apteklərə getmədən dərman almaq və s. imkanlar mümkün olacaq.