Fransanın “Carmat” şirkəti tərəfindən süni ürək hazırlanıb.
Aztibb.az belta.by saytına istinadən yazır ki, süni ürək formasına görə insan ürəyinə bənzəyir, çəkisi 4 kq-dır. Hər 4 saatdan bir enerji ilə doldurulması tələb olunan iki akkumulyator bloku ilə işləyir.
"Datçiklər qan təzyiqini müəyyənləşdirir və bunun nəticəsində alqoritm real vaxt rejimində qan axınına nəzarət edir. Süni ürək insan ürəyi kimi işləyir, pasiyent hərəkət etdikdə qan axını artır, pasiyent istirahət etdikdə isə qan axını sabit olur və azalır", – “Carmat” şirkətinin baş direktoru Stefan Piat deyib.
Onun sözlərinə görə, xəstənin qanı ilə təmasda olan detallar yan təsirlərlə bağlı riski azaltmaq üçün insan bədəninə uyğun materialdan hazırlanıb. Cərrahi implantasiyadan sonra qurğu heç bir baxım tələb etmir.
Hazırda süni ürək üzərində keçirilən sınaqda 19 pasiyent iştirak edir.
Qeyd edək ki, Şirkət 2020-ci ilin dekabrında öz süni ürəyinin Avropa Birliyində satışına icazə alıb. “Carmat” şirkəti iyunun sonunadək Almaniyada öz süni ürəyinin satışına başlamağı ümid edir. 2021-ci ilin sonunadək 20 belə qurğunun istehsalı planlaşdırılır.