Allergiya orqanizmin antigen təbiətli maddələrə qarşı yüksəlmiş və təhrif olunmuş reaksiyasıdır. Orqanizmin yad və ya potensial təhlükəli hesab edib, ona qarşı anticisimlər hasil etdiyi hər hansı maddəyə antigen deyilir. Allergiya törədən antigenlər allergen adlanır. Hər insanın bədənində İgE adlanan anticisim istehsal edilir. Allergik insanların bədənində isə daha çox İgE istehsal edilir. Bu zaman immun sistemi tam zərərsiz cisimlərə potensial təhlükəli kimi reaksiya verir. Yəni allergik insan bədəninə zərər verəcək heç bir şey olmadığı halda, qəfildən narahatlıq keçirir.
Allergiyanın əlamətləri onun növlərinə görə dəyişir. Aztibb.az allergiyanın əlamətlərini təqdim edir:
Allergik rinit zamanı aşağıdakı əlamətlər özünü göstərir:
* asqırma;
* burun, göz və ya ağızda qaşınmalar;
* burun axması və ya tutulması;
* sulu, şişmiş və qızarmış gozlər.
Qida allergiyası özünü aşağıdakı əlamətlərlə göstərir:
* ağızda geyişmə;
* dodaq, dil, üz və boğazda şişkinlik;
* dəridə səpgilər;
* anafilaktik şok.
Böcək sancması zamanı allergiya baş verdikdə müşahidə olunanlar:
* böcək sancdığı nahiyyədə şişkinlik;
* qaşıntı və bütün bədəndə səpgi;
* öskürək, nəfəs daralması;
* anafilaktik şok.
Dərman allergiyası zamanı baş verən əlamətlər:
* dəridə səpgilər və qaşınmalar;
* istilik və ya üşütmə;
* üzün şişməsi;
* xırıltı;
* anafilaktik şok.
Dəriyə toxunan zaman meydana çıxan allergik əlamətlər:
* qızartı;
* qaşıntı;
* qabıqvermə;
* anafilaktik şok.
Allergiyanın ağırlaşması anafilaktik şok əmələ gətirir. Bu zaman aşağıdakı əlamətlər meydana çıxır:
* huşun itməsi;
* arterial təzyiqin düşməsi;
* nəfəs çatışmazlığı;
* dərinin rəngini dəyişməsi;
* sayıqlama;
* nəbzin zəifləməsi;
* ürəkbulanma və qusma.