"Şəhərsalma və Memarlıq ili" çərçivəsində Qobustan Rayon İcra Hakimiyyətinin, Yeni Azərbaycan Partiyası Qobustan rayon təşkilatının və Qobustan Rayon Mərkəzi Xəstəxanasının birgə təşkilatçılığı ilə görkəmli oftalmoloq-alim, Əməkdar elm xadimi, akademik Zərifə xanım Əliyevanın doğum gününə həsr olunmuş “Nurlu ömrün salnaməsi” adlı tədbir keçirilib.

Bu məlumat Aztibb.az-a Qobustan RMX-dan verilib.

Əvvəlcə Azərbaycan Respublikasının Dövlət Himni səsləndirilib, ardınca Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Tədbirdə akademik Zərifə xanım Əliyevanın həyat və fəaliyyətindən bəhs edən qısametrajlı film nümayiş olunub.

Daha sonra tədbirdə Qobustan Rayon İcra Hakimiyyətinin başçısı Adil Məmmədov, Yeni Azərbaycan Partiyası Qobustan rayon təşkilatının sədri Qasım Qasımov, Qobustan Rayon Mərkəzi Xəstəxanasının direktoru Günay Muradova, tibb müəssisəsinin baş həkimi Xəyalə İmanova və Səhiyyə İşçiləri Həmkarlar İttifaqının Qobustan rayon təşkilatının sədri Kəmalə Zərbaliyeva çıxış edərək akademik Zərifə xanım Əliyevanın Azərbaycan səhiyyəsinin inkişafındakı müstəsna xidmətlərindən, oftalmologiya elminə verdiyi töhfələrdən və zəngin elmi irsindən danışıblar.

Çıxışlarda, eyni zamanda ölkədə səhiyyə sahəsində həyata keçirilən islahatlar, tibbi xidmətlərin keyfiyyətinin yüksəldilməsi istiqamətində görülən işlər və dövlət qayğısının əhəmiyyəti vurğulanıb.
Tədbirdə rayon ictimaiyyətinin nümayəndələri, səhiyyə işçiləri və gənclər iştirak edib.

Sonda Yeni Azərbaycan Partiyası sıralarına yeni qəbul olunanlara üzvlük vəsiqələri təqdim olunub, tədbir Yeni Azərbaycan Partiyasının Himninin sədaları altında başa çatıb.