Fövqəladə Hallar Nazirliyinin Cənub Regional Mərkəzinin hazırlıq planına və Cəlilabad Rayon İcra Hakimiyyətinin 2026-cı il üçün təsdiq edilmiş mülki müdafiə tədbirləri planına uyğun olaraq rayonda mülki müdafiə sahəsində növbəti təlim təşkil olunub.

 

Aztibb.az-ın xəbərinə görə, Cəlilabad rayon mərkəzi stadionunda hərbiləşdirilməmiş ərazi mülki müdafiə dəstələrinin iştirakı ilə xəbərdarlıq toplanış üzrə mülki müdafiə məşqi keçirilib.

 

Təlimin əsas məqsədi fövqəladə hallara hazırlıq səviyyəsinin artırılması, operativ reaksiya imkanlarının gücləndirilməsi və aidiyyəti qurumlar arasında koordinasiyanın təkmilləşdirilməsidir.

 

Məşq çərçivəsində 2 ədəd təcili və təxirəsalınmaz tibbi yardım avtomobili, zəruri tibbi avadanlıqlar və 4 nəfər həkim heyətinin iştirakı təmin edilib. Bu, fövqəladə vəziyyətlər zamanı tibbi təminatın operativ təşkili baxımından mühüm əhəmiyyət daşıyır.

 

Qeyd edək ki, bu cür tədbirlər əhalinin təhlükəsizliyinin təmin olunması və fövqəladə halların nəticələrinin minimuma endirilməsi istiqamətində həyata keçirilən kompleks tədbirlərin tərkib hissəsidir.