Sumqayıt Tibb Mərkəzinin tabeliyində fəaliyyət göstərən ailə sağlamlıq mərkəzləri tərəfindən İmmunizasiya Həftəsi çərçivəsində şəhər ərazisində genişmiqyaslı profilaktik tədbirlər həyata keçirilib.

 

Mərkəzdən Aztibb.az-a verilən xəbərə görə, ötən həftə ərzində həm şəhərin müxtəlif yaşayış massivlərində, həm də ətraf ərazilərdə təşkil olunan tədbirlər nəticəsində ümumilikdə 1263 uşaq peyvənd olunub.

 

Kampaniyanın əsas məqsədi uşaqların yoluxucu xəstəliklərdən qorunmasını təmin etmək, immunizasiya göstəricilərini yüksəltmək və valideynlər arasında peyvəndlərin vacibliyi ilə bağlı məlumatlılığı artırmaq olub.

 

Ailə sağlamlıq mərkəzlərinin tibb işçiləri tərəfindən səyyar xidmətlər təşkil edilib, uşaqların peyvəndlənməsi ilə yanaşı, valideynlərlə maarifləndirici söhbətlər aparılıb və profilaktik tövsiyələr verilib.

İmmunizasiya tədbirləri Ümumdünya Səhiyyə Təşkilatı-nın tövsiyələrinə və ölkədə tətbiq olunan milli peyvənd təqviminə uyğun şəkildə həyata keçirilib.