Səhiyyə sahəsində həyata keçirilən məqsədyönlü tədbirlərin tərkib hissəsi kimi diqqət mərkəzində olan kadr potensialının gücləndirilməsi məqsədilə orta tibb işçiləri üçün növbəti vakansiya elan olunub.

 

Naxçıvan MR Səhiyyə Nazirliyindən Aztibb.az-a verilən xəbərə görə, elana əsasən, Naxçıvan şəhəri və rayonlardakı tibb müəssisələrində tibb bacısı, laborant, mama, əczaçı və feldşer ixtisasları üzrə işçi qəbulu aparılır. Müxtəlif istiqamətlər üzrə mütəxəssislərin cəlb olunması səhiyyə xidmətlərinin əlçatanlığını artırmaqla yanaşı, bölgələrdə tibbi təminatın daha da gücləndirilməsinə xidmət edir.

 

Tibb işçilərinin işə qəbulu Azərbaycan Respublikası Nazirlər Kabinetinin 18 iyul 2024-cü il tarixli, 344 nömrəli qərarı ilə təsdiq edilmiş “Dövlət səhiyyə sisteminə daxil olan tibb müəssisələrinə tibb işçilərinin işə qəbulu Qaydası”na uyğun həyata keçirilir. Bu isə seçim prosesində şəffaflıq, obyektivlik və peşəkarlıq meyarlarının əsas götürüldüyünü bir daha təsdiqləyir.

 

Müsahibədə iştirak etmək istəyən şəxslər aşağıdakı link vasitəsilə vakansiyalarla tanış olub, qeydiyyatdan keçə bilərlər: https://kabinet.e-health.gov.az/modul/miq/vacancies

 

Namizədlər “Vahid Səhiyyə İnformasiya Sistemi”nin (VSİS) “İşə qəbul” altsistemi vasitəsilə elektron qaydada qeydiyyatdan keçərək müsahibə mərhələsində iştirak edə bilərlər. Müsahibə nəticələri yekunlaşdırıldıqdan sonra bütün müraciət edənlərə cavablar şəxsi kabinetləri üzərindən təqdim olunacaqdır.

 

Qeyd olunmalıdır ki, vakant yerlərlə bağlı yeniliklər mütəmadi olaraq sistemdə yerləşdirilir və bu da namizədlər üçün geniş imkanlar yaradır. Yekun nəticələr isə müsahibə mərhələsi tam başa çatdıqdan sonra elan ediləcək.

 

Ümumilikdə, bu kimi təşəbbüslər səhiyyə sahəsinə göstərilən dövlət qayğısının davamlı xarakter daşıdığını, insan kapitalının inkişafının prioritet istiqamətlərdən biri olduğunu və tibbi xidmətlərin keyfiyyətinin artırılmasına xidmət edən islahatların ardıcıl şəkildə həyata keçirildiyini nümayiş etdirir.