Qobustan Rayon Mərkəzi Xəstəxanasında 85 yaşlı pasiyent Nazbikə Musayevada aşkarlanmış yumurtalıq kistinin cərrahi yolla ləğvi uğurla həyata keçirilib.

 

Xəstəxanadan Aztibb.az-a bildirilib ki, yüksək risk qrupuna daxil olan, yanaşı olaraq bronxial astma, arterial hipertenziya və ürəyin keçirici sisteminə aid patologiya – His dəstəsinin sol ayaqcığının tam blokadası diaqnozları mövcud olan pasiyent üzərində əməliyyat uzman cərrah İsmayıl Nəcəfəliyev, Cərrahiyyə şöbəsinin müdiri Yunis Həsənli və anestezioloq-reanimatoloq Orxan Məmmədlinin iştirakı ilə icra olunub.

 

Aparılan cərrahi müdaxilə uğurla başa çatıb. Hazırda pasiyentin vəziyyəti stabildir, müalicəsi tibb personalının nəzarəti altında davam etdirilir.

 

Qeyd edək ki, regionlarda ixtisaslı tibbi xidmətlərin göstərilməsi və mürəkkəb cərrahi əməliyyatların yerində icrası vətəndaşların paytaxta müraciət ehtiyacını azaltmaqla yanaşı, tibbi xidmətlərin əlçatanlığının artırılmasında mühüm rol oynayır.

 

Bu uğurlu nəticə xəstəxanada göstərilən tibbi xidmətlərin keyfiyyətinin və mövcud peşəkar kadr potensialının yüksək səviyyədə olduğunu bir daha təsdiq edir.