Dişlərin vəziyyətinin ümumi sağlamlığa təsiri qədim zamanlardan məlumdur. Hətta müəyyən dövrlərdə qəbiləyə, yaxud məmləkətə başçı seçərkən, dişlərə xüsusi baxış edilirmiş, dişləri sağlam olmayan kəs bu statusa layiq bilinməzmiş.

Həyati vacib orqanlardan olan ürəyə diş-ağız boşluğu sağlamlığı bir neçə yolla təsir edir:

- karies, gingivit, parodontit və s. yerli ihtihabi proseslər sistemli xroniki iltihab törədərək, damar divarlarını zədələyib aterosklerotik dəyişikliklər yarada bilər ki, bu da ürəyin işemik xəstəliyi, infarktla fəsadlaşma ilə təhlükəlidir;

- bakteriyalar ağızdan qan dövranı ilə yayılaraq kəskin infeksion proses (məs., endokardit) törədə bilər;

- azot oksid (NO) adlı maddə ürək damarlarını genişləndirərək, arterial təzyiqi tənzimləyir, qalxmasının qarşısını alır. Azot oksid qida ilə alınan nitratların nitritlərə çevrilməsindən alınır. Həmin çevrilməni icra edən Veillonella spp. bakteriyasıdır. Antiseptik tərkibli ağız yaxalayıcıları bu mikrobu məhv edərək, çevrilməni əngəlləyir və NO kimi mühüm damargenişləndirici maddəni azaldaraq təzyiqin yüksəlməsinə zəmin yaradır;

- yalnız sağlam dişlə mümkün olan mükəmməl çeynəmə, xüsusən də bərk məhsulların (tərəvəzlərin, ət tikəsinin) çeynənilməsi, stress hormonu olan kortizolun səviyyəsini azaldaraq, ürək damar sistemini stresin dağıdıcı təsirindən qoruyur.