Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru Nuran Abdullayevin spektral kompüter tomoqrafiya ilə apardığı növbəti tədqiqat nüfuzlu elmi jurnalın redaksiya heyəti tərəfindən qəbul edilib.

Aztibb.az xəbər verir ki, azərbaycanlı alimin araşdırması "Quantitative Imaging in Medicine and Surgery"da (impakt faktor 3,226) dərc olunaraq elmi ictimaiyyətə təqdim ediləcək.

Tədqiqatda spektral kompüter tomoqrafiya ilə damar patologiyalarının, xüsusilə də beyin qidalandırıcı damarlarda olan patologiyaların dəqiq diaqnozunun qoyulması və onların hazırda dünyada ən müasir metodla çalışan bu kompüter tomoqrafiya ilə yüksək keyfiyyətdə vizualizə edilə bilməsi sübut edilir.

Qeyd edək ki, Nuran Abdullayev və Köln Universitetində çalışdığı komanda spektral kompüter tomoqrafiya ilə apardıqları elmi tədqiqatların səviyyəsinə görə dünyada birinci yerdədir. Onlar dünyanın bir nömrəli radioloji jurnallarında çap olunacaq elmi tədqiqatlarının kliniki əhəmiyyətinə görə bu günədək bir neçə milyon avroluq təqaüdlərə layiq görülüblər. Azərbaycanlı həkimin radiologiya sahəsində belə bir uğurunun olması isə ölkəmizin tibb tarixində bir ilkdir.