Tokio Universitetinin alimləri canlı insan dəri hüceyrələri ilə örtülmüş robot barmağı hazırlayıblar. Yeni texnologiya robototexnika ilə toxuma mühəndisliyini birləşdirərək insan dərisinə daha çox bənzəyən robotların yaradılması istiqamətində mühüm elmi addım hesab olunur.

Aztibb.az "Scinecefocus" nəşrinə istinadən yazır ki, hazırlanmış robot barmaq mexanizmlə birlikdə əyilə bilir. Onu örtən canlı toxumanın zədələnmiş hissəsinin isə xüsusi kollagen materialının köməyi ilə bərpası mümkündür. Bu xüsusiyyət gələcəkdə robotların səthində canlı toxumaların saxlanılması və onların zədələnmədən sonra bərpası mexanizmlərinin öyrənilməsi üçün yeni imkanlar yarada bilər.

Tədqiqat robototexnika və toxuma mühəndisliyinin imkanlarını bir araya gətirərək insan dərisinin quruluşunu və xüsusiyyətlərini təqlid edən sistemlərin hazırlanmasına yönəlib. Perspektivdə bu texnologiyadan tibbi tədqiqatlarda, eləcə də dərinin zədələnmədən sonra sağalma proseslərinin öyrənilməsində istifadə oluna bilər.

Bununla belə, canlı dəri ilə örtülmüş robotların geniş tətbiqinə nail olmaq üçün hələ bir sıra texniki problemlər həll edilməlidir. Hazırkı örtük kövrəkdir və canlılığını qorumaq üçün müəyyən rütubət şəraitinin təmin edilməsini tələb edir.

Alimlərin bu istiqamətdə apardığı araşdırmalar canlı toxumaların robotlaşdırılmış sistemlərə inteqrasiyasının imkanlarını genişləndirir. Bu yanaşma gələcəkdə insan dərisinə daha çox bənzəyən robot örtüklərinin hazırlanmasına və canlı toxumaların mexaniki sistemlərlə qarşılıqlı əlaqəsinin daha dərindən öyrənilməsinə töhfə verə bilər.