Azərbaycan Tibb Universitetinin (ATU) Tələbə Həmkarlar İttifaqı Komitəsi (THİK) tərəfindən elan edilmiş "Sosial məlumatlandırma həftəsi" çərçivəsində universitetin 1-ci kurs tələbələri üçün onlayn formada geniş sessiya təşkil olunub.

 

Sessiyada universitetin 90 ildə keçdiyi yol, sosial ictimai həyatı, tələbələr üçün fəaliyyət göstərən ictimai, elmi və könüllü təşkilatlar haqqında geniş məlumat verilib.

Görüş zamanı ATU THİK-in sədri Elvin Kərimli bildirib ki, pandemiya ilə əlaqədar olaraq, 1-ci kurs tələbələri ilə bu dəfə onlayn formada təşkil olunan görüşün məqsədi tələbələrin asudə vaxtının səmərəli təşkil olunması ilə bağlı imkanlar təqdim etmək, bu istiqamətdə maariflənməni gücləndirməkdir.

 

Sessiyada ATU THİK-in sədr müavini Cavid Mustafazadə, komitə üzrə fakültə və klub sədrləri görülən işlər, mövcud vəziyyət və gələcək planlar haqqında məlumat veriblər. Həmçinin tələbələri maraqlandıran suallar cavablandırılıb.

 

Qeyd edək ki, bir həftə ərzində hər gün müxtəlif fakültə tələbələri üçün bu kimi məlumatlandırma sessiyaları keçirilib. Tədbirlərdə 400-ə yaxın 1-ci kurs tələbəsi aktiv iştirak edib. Görüşlərdə iştirak edən tələbələri qoşulmaq istədikləri təşkilatlara yönləndiriblər. Həm də bəzi xüsusi istedadlı tələbələrin bacarıqlarını inkişaf etdirməsi üçün müvafiq qeydiyyat aparılıb.